豆腐字？是按怎？

是按怎會拄著欠字的問題？

這个問題會當共分做「編碼」、「字型」、「輸入法」三个部份。

編碼

每一个欲佇咧電腦存取的字，攏愛有一个編碼。
若無編碼，字就會落勾去，電腦無法度共紀錄落來。

這馬的電腦，大部份用的攏是 Unicode 這个標準。
這个標準會一直更新，支援閣較濟的語言文字。

現此時賰客語的「󿕅」猶未編碼。
若拄著猶未編碼的字，會使先暫時使用 私人使用區 的碼位。
所以基本上，編碼已經袂有啥物大問題矣。

佇 Unicode 普及進前，台灣用的是 Big5 這个標準。
香港以 Big5 做基礎，閣做一个 香港增補字符集，收錄香港需要用著的字。

再會豆腐字利用官方公佈的本土語言相關資料，
整理出 本土語言外字表，收錄本土語言所用會著的字。

字型

這是上主要的問題，愛有字型通共顯示，咱才看會著。

字型內底的字毋是電腦生出來的，是需要設計師一个一个畫的。
大部份的台灣字型漢字，干焦會畫 Big5 有收錄的 13,060 字 ，
所以拄著台語、客語的漢字，就會出問題。

若是拄著遮的無法度顯示的字，就會出現「豆腐字」。
常見的形式有：

• 四角格仔、中央一个叉
• 四角格仔、中央一个問號
• 四角格仔
• 空白

再會豆腐字透過字型編輯軟體，以自由字型做基礎，做出本土語言字型。
會當到 字型增補 下載、安裝字型，嘛有提供網頁字型服務。

輸入法

除了編碼、字型的支援，閣愛有輸入法會當輸入遮的字。

過去這幾冬，一寡台語、客語漢字已經有正式的 Unicode 編碼矣，
教育部輸入法一直無更新，猶咧用私人使用區，無共改做正式的編碼。

再會豆腐字對教育部輸入法的詞庫進行一寡改進，
會當到 輸入法詞庫修補 下載輸入法的詞庫檔。